Davao City – Mga magpapatigayon sa syudad sa Davao nanawagan sa katawhan nga mamahimong mabinantayon niining pagpatuman sa mga bag-ong buluhisan ilawom sa administrasyon ni Pres. Rodrigo Duterte.
Sumala sa miyembro sa Board of Directors sa Davao City Chamber of Commerce and Industry Inc. (DCCCII) Antonio “Tony” dela Cruz, sila nagtoo nga minimal lamang ang bag-ong buluhisan sa tumong aron masuportahan ang programa sa presidente nga “Build, Build, Build” aron makamugna ug daghang mga trabaho.
Apan giklaro usab ni Dela Cruz nga kung buhis na gani ang patas-an, aduna gayud kini gitawag nga “domino effect” sa ubang produkto ug ang unang maapektohan niini ang mga yanong katawhan. Nagtoo si Dela Cruz nga kung ang mabagang katawhan ang mo-angal niini gilayon usab nga mohatag ug action ang presidente.
Hinoon gipasabot ni Dela Cruz nga wala pa man gayud hingpit nga napatuman ang maong lakang, obserbahan una apan kung dako gayud kini og epekto sa matag-adlaw nga panginahanglanon sa mga tawo ayha pa mopadayag og pagsupak.
RadyoMaN Bernard Pantallon
