Davao City – Gumikan sa pagsutoy sa presyo sa mga spare parts mibati na og kalisud ang mga operators sa mga de pasaheroan sama sa mga taxi units.
Ang pagsaka sa presyo sa mga spare parts sa mga sakyanan nunot kini sa epekto sa Tax Reform Accelera-tion and Inclusion kun TRAIN Law.
Mas nabug-atan pa gyod ang mga operators sa transportation modernization program nga gipatuman sa gobyerno ug dugang pa ang walay hunong nga pagsaka sa presyo sa produktong petrolyo.
Aron makasapar sa galastuhanan napugos ang mga taxi companies sa pag-usbaw sa renta sa ilang mga units pinaagi sa recalibration apan nahan-ok ang palas-unon ngadto sa mga drivers.
Apan matud ni Southeastern Mindanao Diversified Drivers Operators Cooperative (SEMDDOC) President Maning Duran makaturangonon ang usbaw sa taxi sanglit walay laing mahimo ang mga operators gawas sa pag-increase.
Gikontra ni Duran ang pasiatab sa mga taxi drivers nga sila maoy naglukdo sa epekto sa recalibration ug usbaw sa pletehan tungod kay daghan ang dili na ganahan musakay sa mga taxi gi-calibrate.
Buot huna-hunaon mas miginansiya pa gani ang mga drivers kaysa sa mga operators apan ang problema lang kay wala kini makita sa kadaghanan gumikan sa kadaghanan sa mga units, dugang sa Semddoc President.
Hagit na lamang ni Duran ngadto sa reklamador nga mga taxi drivers nga muhawa na lang sa presenteng mga taxi companies nga ilang gipasilungan nungka magpa-ugat aron makapangita og laing mga units nga barato lang og abang.
RadyoMaN Joel Viray
