Davao City – Wala pa mailhi ug masakpi sa kapulisan sa Sasa ang duha ka tulisan nga mi-holdap ug miluba sa usa ka taxi driver resulta nga kritikal ang kahimtang sulod sa Southern Philippines Medical Center (SPMC).
Naglisod ang Sasa PNP Homicide Section sa pagbaton og lead sa pagkatawo sa duha ka tulisan sanglit dili pa maistorya ang driver kay under observation pa kini sa sulod sa SPMC.
Giila ni PO3 Alfred Noya ang biktima nga si Jaime Custodio, 57 anyos, minyo, holiday taxi driver ug nagpuyo sa Lanzona Subdivision, Matina kinsa nakahiagom og samad sa dughan ug sa abdomen.
Nasayran nga nagsakay ang mga tulisan gikan sa Sasa Wharf ug nagpahatod sa Medina Village Road apan pag-abot sa lugar kalit migideklara og holdap ang mga suspek 12:45 sa kagabhion.
Dihang gitunol sa biktima ang tres mil pesos nga income niini sa pagpamasada ngadto sa mga tulisan mi-suway kini og bugno sa mga suspek mao giluba kini sa makaduha ka higayon gamit ang kutsilyo.
Malampuson nga nakagawas sa taxi si Custodio ug midagan paingon sa kabalayan mao nga nakapangayo kini og tabang sa mga residente samtang ang mga tulisan dali nakasibat agi sa Green Meadows Village.
RadyoMaN Joel Viray
