BACOLOD CITY – Makaluluoy nga nagreport sa police ang isa ka taxi matapos ini siya ang ginhold-up sang duha ka wala makilala nga suspek pasado las 7 ang takna kagab-i sa Bugnay St., C.L. Montelibano Ave. sa Barangay Villamonte, Bacolod City.
Nakilala ang biktima nga si Arnel Lape, 49 anyos ang edad, pumuluyo sang Prk. Masanag Uno, Brgy. 26, Bacolod City.
Ginpangunahan mismo ni Station 4 head Police C/Insp. Richee Gohee ang pagresponder sa tawag nga may ginhold-up nga taxi sa amo nga area.
Suno sa biktima, nagsakay ang 2 ka mga suspek apang sa paga-abot sa amo nga area ini sila ang nagdeklarar sang hold-up kadungan sa pagtaya sang wala matumod nga kalibre sang armas.
Wala labot nga ginkuha sang mga suspek ang 3 mil pesos nga koleksyon, ila pa gindala ang taxi sang biktima kag gin-gamit nga get-away vehicle.
Ang taxi nakit-an sa Josefa St., Eroreco Mandalagan.
Isa sa mga suspek nga si Johnny Villarante ang kilala sang driver sa ‘Rogues Gallery’ nga ginasiling nagbulag sa grupo ni ‘Rondoy’ kag ‘Aki Cuadra’ nga una nadakpan sang Police Station 3 kag nakapyansa.
