Taxi driver nga overcharging ug nangontrata’g pasahero, arestado

Davao City – Malampusong nadakpan sa joint entrapment operation sa Buhangin Police Station, City Transport and Traffic Management Office (CTTMO) ug Land Franchising and Regulatory Board Davao ang taxi drayber nga namakyaw ug nangontrata og pasahero sa Davao International Airport karong hapon.

Segun ni Police Major Jonel Pederio, Buhangin Police Station Commander, P1,300 ang singil sa drayber ngadto sa ilahang undercover nga pasahero nga nisakay gikan airport ug nag-pahatod sa Calinan.

Giidentipika ang drayber nga si Randel Villacarlos, 49 anyos ug residente sa Phase 2 S.I.R Phase 2, New Matina, Davao City.

Segun ni Pederio, kasong grave coercion ang ipasaka batok sa suspek samtang ubay-ubay usab ang violation niini sa LTFRB ang wala paggamit og metrohan, pagpangontrata’g pasahero, nasayran usab nga deperensyado ang sirbato niini ug wala paguniporme nga gapamasada.

Wala usab gilimod sa nadakpang drayber ang iyahang pagpamakyaw nga nasayod kini bawal kini sa balaod.

Hugot nagpahimangno ang lokal nga panggamhanan sa Davao nga bawal ang dili paggamit og metrohan sa mga taxi ug giawhag ang publiko nga ireport ang mga abusadong mga drayber ilabina karong holiday season.

RadyoMaN Aimee Guinita