Davao City – Wala malipay ang usa ka taxi driver sa kamanduan sa Land Transportation Franchising and Regulatory Board (LTFRB) sa gipatuman nga recalibration sa mga taxi unit dinhi sa siyudad sa Dabaw.
Sumala sa taxi driver nga si Carlito Martrillas, wala makatabang kanila ang recalibration inay mas nagpalisud pa hinoon kini sa mga taxi drivers nga igo lang nagrenta sa ilang mga unit matag adlaw.
Sigun ni Martrillas, dakong disbentaha sa mga taxi drivers ang mao nga palisiya kay ang naharuhay lang sa recalibration mao ang mga taxi companies ug mga owners nga igo lang nagpaabot sa bayad sa renta.
Matud ni Carlito, sukad gi-recalibrate ang mga taxi karon nagmahal sab ang renta sa ilang mga units ug ang problema nagkunhod ang volume sa mga pasahero karon.
Wala gilimod niini nga nabug-atan ra kini sa 100 hangtud 150 pesos nga usbaw sa abang diin sa karon muparka na og 1,500 ang arkila matag adlaw ug posible mahimo pa kini hangtud sa 300 kun calibrated na ang tanang taxi units.
Kalbaryo usab kanila ang padayong pagsaka sa presyo sa petrolyo diin apektado na ang ilang adlaw-adlaw nga panginahanglanon kay makadala na lang kini og 300 pesos gikan sa 500 pesos gikan sa 24 oras nga pamasada.
Bisan paman sa negatibo nga domino effect sa recalibration, wala matud pa silay laing mabuhat gawas sa pagsunod sa kamandoan sa LTFRB hangtud malukop ang tanang taxi units sa calibration.
Mao nga panawagan ni Carlito Martrillas ngadto sa buhatan sa LTFRB nga mupagula og kamanduan aron pugngan ang mga taxi companies sa pagpa-usbaw sa renta sa mga units.
Kung dili matud pa kini buhaton sa LTFRB silang mga drivers maoy makaluluoy samtang ang mga tag-iya sa mga taxi companies hayahay kaayo ang pamati apan sila alaot sa tanang alaot.
RadyoMaN Joel Viray
