Davao City – Posibleng giatake sa high blood ang driver sa taxi nga nabangga sa likod sa naka-parada nga truck sa C.P. Garcia (Diversion Road) partikular na sa under-construction overpass, Ma-a, Davao City alas 6:10 sa buntag kagahapong adlawa (Huly 19, 2022).
Sa interbyu sa DXDC RMN Davao kang Police Senior Master Sergeant (PSMS) Joseph Pantinople sa Maa Police Station, giila niini ang driver sa taxi nga si Noel Rebucas, taga Nabunturan, Davao de Oro nga kasamtangang nagpuyo sa Barangay Ilang, ning syudad.
Matud ni Pantinople nga duda ang pamilya nga giatake kini rason sa aksidente.
“Naistorya lang namo ‘tong iyahang pamilya ug kadtong iyang live-in partner. Naa na daw ‘to siyay maintenance sa high blood. Ilahang duda basin gi-atake daw pag-drive. Sa ilaha lang na nga bersyon,” matud sa pulis.
Gibutyag sa pulis, nabunal ang ulo sa biktima sa windshield hinungdan nga nakahiagom kini og serious injury nga padayon karong gitambalan sa Southern Philippines Medical Center (SPMC).
RadyoMaN Kirby Manzon
Facebook Comments
