TACLOBAN CITY – Arestado han Philippine Drug Enforcement Agency (PDEA) ngan PNP an pito nga suspek nga nagbabaligya hin illegal nga droga ha Purok 3, Brgy Obrero, Calbayog City, Samar dida han sabado, january 26, 2019.
Basi ha report han PDEA, ginkilala an mga suspek nga hira Marvin Llebado Catamora, 32 anyos, waray asawa, usa nga mangirisda; Lina Reoyan Salurio, 50 anyos, may asawa, usa nga canteen vendor; Manilyn Genaldo Sarmiento, 30 anyos, usa nga admin staff; Gregorio Llebado Catamora, 35 anyos, usa nga sidecar driver; Ronaldo Lagarto Ompad, 39 anyos, usa nga carpenter; George Tayab Dimakiling, 35 anyos, usa nga sidecar driver; ngan Marvy Llado Catamora, usa nga licensed teacher pero waray trabaho ngan mga residente ha Calbayog.
Ha buy bust operation, napalit tikang ha mga suspek an unom kapakete han gin-aaligar shabu ha kantidad nga P102,000.00, may kabug-at nga 15 gramo.
Nakumpiska pa tikang ha mga suspek an mga drug paraphernalia, usa nga cal. 45 nga pusil ngan may sulod nga pito nga bala.
Maatubang an mga suspek ha mga kaso nga section 5 (sale of dangerous drugs), section 6 (maintenance of drug den), section 7 (employees, visitors of drug den), section 11 (possession of dangerous drugs) ngan section 12 (possession of drug paraphernalia) han RA 9165.
Ha pagka yana, paslak na an mga suspek ha Calbayog City PNP lock up cell.
