Davao City – Subay sa nagsingabot nga kapaskohan, nagsugod na og atake ang mga kawatan sa area of responsibility sa Sasa Police Station.
Nabuenamanohan sa mangunguot ang usa ka magtutudlo nga si Amie Alinsub, 41 anyos, minyo, ug nagpuyo sa Vista Verde, Panacan, syudad sa Davao.
Alas-9:00 sa buntag misakay og PUJ (Public Utility Jeepney) gikan downtown area ang biktima ug pagnaog niya sa Panacan, nadiskubrehan nga nawagtang na ang iyang mahalong cellphone.
Matud niini, sa wala pa siya misakay adunay lalake nga itumon og pamanit ug mubo’g buhok ang mibangga kaniya.
Nagtoo siya nga gituyo sa wala mailhing suspek ang pagdasmag kaniya aron dili mabantayan ang pagkuot sa selpon nga gikasuksok sa likod nga bulsa sa pantalon.
Igo na lang nagpatala ang magtutudlo sa Sasa Police Station sa pamasin pa nga masubay ug mailhan ang kawatan nga mibiktima kaniya.
Sa pikas bahin, meriklamo sa San Pedro Police Station, ang usa ka vendor human gikawatan sa duha ka mahalong cellphone, balor kapin P20,000.00 sulod sa iyang tindahan sa Larayan 2000, Bankerohan siyudad sa Davao.
Sa report gikan Presinto dos, biktima nailang Alquin Niegos, 26 anyos, residente sa nahisgutang lugar samtang suspetsado nailang “Archie” hingkod ang edad ug walay kompletong address.
Saysay pa sa biktima, naaktohan niya ang suspek nga maoy mikuha sa iyang duha ka cellphone, apan abtik nga nisibat sa wala matino nga direksyon. Tungod niini pursegido nga mopasaka’g kaso ang biktima batok kang Archie.
RadyoMaN Joel Viray, RadyoMan Don Pulayao
