Davao City – Alang sa mga out-of-school youth ug sa wala makatungtong ug makahuman sa kolehiyo, mas maayo nga himoong alternatibo ang technical-vocational courses ubos sa pagdumala sa Technical Education and Skills Development Authority (TESDA).
Matud ni Second District Councilor Dante Apostol, ang tech-voc alternatibo aron makakita gihapon og trabaho ug makabaton og pangibabuhi ang wala makahuman og upat ka tuig nga kurso sa kolehiyo.
Matud ni Apostol, mas iyang pilion ang pagkuha og vocational courses sa TESDA kaysa upat ka tuig nga kurso sa kolehiyo kay dali rang makasulod og trabaho.
Ubos sa Duterte administration, daghan og kapilian ug kasudlan nga trabaho ang makahuman sa technical skills and vocational courses sa TESDA gumikan sa ‘Build, Build, Build’ program sa gobyerno sa tibuok nasud.
Gawas niini, mas dali usab madawat sa ubang kanasuran ang mga Pinoy nga dunay background ug NC II sa TESDA.
Segun sa konsehal, dili garantiya nga kun makahuman og upat ka tuig nga kurso sa kolehiyo makakita ug makasulod dayon og trabaho ug muasenso ang kinabuhi apan sa vocational, daghang bakante nga matang sa panarbaho.
Dugang ni Apostol nga ang vocational courses in demand kun gikinahanglang karon aron mahulipan ang mga skilled workers nga nanarbaho na sa ubang kanasuran.
Daku og ikatabang sa pag-angat sa ekonomiya ang skilled workers sama sa panday, construction workers ug daghan pang uban nunot niining pagtukod sa halapad nga mga imprastraktura sa tibuok nasud kutob sa tuig 2022.
RadyoMaN Joel Viray
