Davao City – Alang sa Parish Pastoral Council For Responsible Voting (PPCRV) Davao Chapter, normal lamang ang wala pagganar sa mga Vote Counting Machines kun VCMs ug Voter Registration Verification Machines kun VRVM.
Matud ni PPCRV Regional Coordinator Jimmie Loe Dela Vega, ang pagkapalyar sa mga makina natural lamang nga panghitabo ug dili matud pa kini malikayan.
Daghan sa mga botante nalangay og boto kagahapong adlawa tungod sa nag-malfunction nga mga makina diin hapon na kini nga napulihan.
Giganahan si Dela Vega sa bag-ong sistema sa piniliay karon tungod kay paspas ang pagboto sa mga botante itandi sa miaging katuigan nga gawas sa mga daut nga electoral machines, langay usab ang pagboto.
Sa obserbasyon ni Dela Vega nga segundo lang mahibaloan na sa mga botante ang iyang personal nga datos nga gikinahanglan sa mga sakop sa electoral board una kini tugotang makaboto.
Segun ni Dela Vega, ang VCM ug VRVM nakatabang sa pagsanta sa vote buying ug pagpanikas ug flying voters nga sagad mahitabo sa mga piniliay.
Malaumon si Dela Vega nga sa kinatibuk-an, mamahimong maayo ang resulta sa pilot testing sa VRVM dinhi sa siyudad ug sa Dabaw del Sur ug wala sa’y natala nga bayolenteng panghitabo palibot sa rehiyon.
Sa kinatibuk-an, nagmalinawon ang eleksyon kagahapon adlawa.
RadyoMaN Joel Viray
