Davao City- Gilaraw karon ang katukoran sa usa ka dedicated hotline nga mamahimong matawagan sa mga tawong nibati’g depresyon sa ilang kinabuhi ug nangandoy nga makakaplag ug resolusyon sa maong suliran.
Matud ni City Social Services and Development Office (CSSDO) head Maria Luisa Bermudo, ang maong laraw natawo bunga sa pipila ka mga insidenteng suicide dinhi sa dakbayan nga gituhuang gumikan sa nasinatiang grabeng depresyon sa mga tagtungod.
Gibutyag ni Bermudo nga adunay pipila ka mga indibidwal ang nidangop na sa ‘Kean Gabriel Hotline’ aron mapadayag lamang ang ilang mga suliran.
Sumala sa opisyal nga andam mo-partisipar ang nagkadaiyang mga ahensya partikular ang City Health Office (CHO) kinsa mamahimong mag-montar ug mga ‘teen centers’ diin adunay mga ekspertong staff kinsa andam ug taganang mo-asistir ngadto sa mga nakasinati ning maong klase sa balatian.
Matud ni Bermudo, gikinahanglan nga palig-onon usab ug maayo ang ‘guidance counseling component’ sa mga pagpanudlo sa matag tulunghaan sa dakbayan haron mas ma-edukar ug mas masabtan pa sa halawom nga pamaagi ang mga kawsa ug tukma nga responses kalabot sa depresyon.
RadyoMan Aimee Guinita
