Davao City – Usa sa kritikal kaayo nga katikaran sa atong panahon mao kining pagka-imbento kun pagka-diskubre sa modernong teknolohiya sama sa paghidangat sa internet, sa social media, gadgets ug uban pang mga kagamitan nga nahimo nang tipik ug kabahin sa atong inadlaw-adlaw’ng pagkinabuhi.
Sama sa tanang butang, ang nanghinobrang pagdepende sa internet ug mga gadgets mohatud gayud ug dili maayo – ilabi na dinha sa pag-eskwela sa atong mga kabataan.
Busa, subli natong gidasig ang mga ginikanan nga mao gyuy unang mohimo sa regulasyon or palisiya sulod sa panimalay kun kanus-a ug hangtud asang bahina lamang kutob mogamit ug bag-ong kagamitan ang atong mga anak ug mga tinun-an.
Ang eskwelahan usab angay mangusog nga idili ang patugaras nga paggamit sa ingon ug ang entero komunidad angay usab motampo sa ilang pakighiusa aron ang bata dili malulong diha sa internet addiction.
Atong gayung kargo ang pagregulate, pagdisiplina ug ang pag-impose sa hustong mga talamdan ug reglamentos aron mamahimong tunhay ang pag-utilisar sa mga batan-on ning bag-ong matang sa kalingawan.
RadyoMaN June Duterte
