Davao City – Alang kang Davao Second District Councilor Danilo Dayanghirang, chairperson sa Sanggunian Finance, Ways and Means Committee, importante kaayo nga adunay maayong serbisyo ang mga telecommunication companies pinaagi sa internet kay mao kini ang pamaagi nga maka-reach out ngadto sa ubang tawo lakip na dinha ang pamatigayon bisan pa ang pagtoon sa mga estudyante sa karon nga panahon.
Gisaway ni Dayanghirang ang mga telcos tungod sa maut nga klase sa serbisyo ilabi na sa internet connectivity nga mas gipasamot pa gayud sa mas mahal nga singil kun kobransa dili susama sa ubang kanasuran nga barato ra ug makatagbaw ang ilang serbisyo sa internet gani ang ilang mga lokalidad kasagaran WiFi-free na man.
Segun sa konsehal nga kon dili gayod mahatag sa mga telcos ang maayong serbisyo sa internet pag-abot og December, andam kini nga mupabor sa stern warning ni Pres. Rodrigo Duterte nga bakwion sa Kongreso ang ilang legislative franchises aron mahatag kini sa ubang telco players nga mas deserving kinsa maoy makatubag sa problema sa internet sa nasud.
Matud ni Dayanghirang, daw nagdasa ang mga higanteng telcos sa nakalabay’ng administrasyon tungod sa pabor nga ilang nakuha apan karon ubos sa Duterte regime, mapitol na ang gayud ang pagpang-abusar sa naasoy’ng telcos.
RadyoMaN Joel Viray
