Gibuksan na ang temporary learning spaces o TLS sulod sa temporary relocation site sa Barangay Sagonsongan, Marawi City.
Kini dungan sa pagbukas sa klase sa tibook nasud, niadtong Lunes, Hunyo 4, alang sa school year 2018- 2019.
Gamit ang mga materyales sama sa plywood, galvanized iron o cin, mga kahoy ug uban pa, nga hinatag sa Church of Jesus Christ of the Latter Day Saints, nakapatukod og napulo ka duplex- type building nga dunay duha ka mga classroom ang kanhi Marawi Central Elementary Pilot School o MCEPS.
Mamahimo kining temporaryo nga tunghaan sa MCEPS, nga dunay kapin dos mil ka mga estudyante niadtong wala pay giyera.
Ang MCEPS usa sa 20 ka mga eskwelahan sa kanhi main battle ground o most affected area nga naguba tungod sa lima ka bulan nga giyera batok sa mga terorista.
Ang 69 ka mga magtutudlo sa nasangpit nga tunghaan ang magpadayon sa ilang pagtudlo dinhi nga eskwelahan.
Matud pa ni Hadja Ramla Paporo Radia, principal sa MCEPS , nga as of kagahapong adlawa, aduna nay 1,069 ka mga enrollees ang maong tunghaan apan 600 kapin pa lang ang mitunga sugod niadtong Lunes.
Gilauman nga human sa Ramadan sa Hunyo 15, o sa pagbalik sa klase sa Hunyo 18, modagsang na ang daghang mga estudyante nga gikan sa ubang mga eskwelahan.
