Gi- anunsiyo sa National Housing Authority niadtong Martes nga kumpleto sa mga pasilidad ang temporary shelter site sa Barangay Sagonsongan alang sa mga pamilya’ng taga-Marawi nga naapektuhan sa nahitabong kagubot didto niadtong nakalabay’ng tuig.
Sa iyang briefing presentation sa pagbisita ni Presidente Rody Duterte, miingon si National Housing Authority General Manager Marcelino Escalada, nga ang temporary shelter site sa Sagonsongan tukuran og eskwelahan nga adunay 15 kamga classroom, usa ka Madrasah nga mismong ang lokal nga kagamhanan sa Marawi ang nag- design, usa ka wet and dry market, usa ka materials recovery facility, usa ka open court, day care ug health center, livelihood center ug transport terminal alang sa sayon nga pagpanakay sa mga mamuyo sa dapit ug mga kasikbit niini nga lugar.
Kumpleto usab kini sa drainage system, sementado nga dalan, patubig ug kuryente, 24/7, matud pa ni Escalada.
Miabot na sa 712 ka mga temporaryong balay ang natapos sa Sagonsongan, diin ang 500 niini na- turnover niadtong Disyembre 27 sa nakalabay’ng tuig.
Ang 150 napuy-an niadtong Enero 20, ang laing 250 napuy-an niadtong Enero 29.
Atol sa pagbisita ni Duterte, gi -turnover usab sa Task Force Bangon Marawi ang 212 ka mga balay ngadto sa mga benepisyaryo niini.
