Davao City- Naguol ang ubang mga tenants nga gipasulod na sa NCCC Mall kaganina aron kuhaon ang ilang mga gamit o nabiling paninda sulod sa nasunog nga mall tungod sumala pa bisan nakasulod sila, dako ang ilang lugi sa maong panghitabo.
Sumala sa ubang mga tenants, dako ang ilang lugi diin ang uban nilang paninda nangadaot na gani ang uban naapil sa sunog.
Kahinumduman nga wala una tugti sa Bureau of Fire Protection kun BFP ang mga tenants nga musulod sa maong mall tungod delikado nga mahulugoan og mga debris gani kaniadtong miaging duha ka semana, dunay pag uyog nga nabati ang mga opsiyal sa BFP sa dihang ilang gisulayan pagsulod ang 4th floor sa maong mall ug nasuta usab nga nahugmak na ang tunga nga bahin sa mall.
Apan human sa duha ka semana, gipasulod na sila apan hugot ug strikto ang mga security guards sa NCCC sa pagpasulod sa mga tenants.
Sa pikas bahin, gipanglubong na ang ubang 3 ka mga biktima sa sunog sa NCCC Mall nga mao sila Mikko Demafeliz diin gilubong kini sa Davao Memorial Park, samtang sa Toril memorial Park gilubong ang abo ni Missy Rose Artiaga ug sa Samal gilubong si Melvin Gaa, ang usa ka NCCC employee nga naapil sa sunog.
Sumala sa mga kabanay nila nga bisan gilubong na ang mga patayng lawas sa ilang minahal sa kinabuhi, dili nila ilubong sa kalimot ang nahitabo ug padayong pangitaon ang hustisya nga angay makab-ot alang sa mga nabiktima sa sunog.
RadyoMaN Renz Barbarona
