Ang Technical Education and Skills Development Authority (TESDA) nagsaulog sa ika-24 nga anibersaryo kaniadtong adlawng Sabado Agosto 25, 2018 diin kini gadala sa tema: “TESDA, Susi sa Magandang Kinabukasan.”
Subay sa maong kasaulogan, ang TESDA-Zamboanga del Norte Provincial Office nga gipanguluhan ni Provincial Director Engr. Alan T. Bacatan, adunay gihan-ay nga mga aktibidadis alang na sa ipahigayon nga month-long celebration diin mamahimong makapartisipar ang mga nagkadaiyang TVIs ingun man katawhan sa probinsya.
Ang pipili ka mga aktibidad mao ang Technical Session alang na sa mga estudyante sa Grades 11 ug 12 ubos sa TVL track sa unom ka mga eskwelahan sa siyudad sa Dapitan, diin magahatag kini ug dugang kahibalo sa mga estudyante isip pagpangandam nila sa ipahigayon nga assessment ug certification sa dili pa sila mu-gradwar sa Senior High School.
Niadtong Agosto 22, 2018 naghimo ug simultaneous Tree Planting Activity diin ang TESDA-ZN nanguna didto sa Dipolog School of Fisheries. Niadtong adlawng sabado ug Domingo Agosto 25-26, 2018 gipahigayon ang usa sa mga highlights isip pagbulok sa maong selebrasyon ang World Café of Opportunities sa KCC Mall de Zamboanga, Zamboanga City. Kini usa ka one-stop shop diin naga-imbitar sa nagkadaiyang pang-gobyerno ug pribado nga sektor alang na sa mga job seekers hilabina sa mga TVET graduates nga mahatagagn ug kahigayunan nga makaangkon ug desinte nga trabaho.
Ang buhatan sa TESDA-ZN isip padayun nga nakigtimbayayong alang na sa paghatag ug kauswagan sa natad sa pangempleyo dinhi sa probinsya, padayun kini nga nagahatag ug Free Assessment sa mga nagkadaiyang ‘qualifications’ sulod sa bulan sa Agosto.
Ang katuyuan sa maong libreng assessment mao ang paghatag ug dakong oportunidad sa mga interesadong katawhan nga makaangkon ug National Certificate diin magpamatuod nga sila usa ka competent ug adunay saktong kahibalo sa maong ‘qualification program’ diin kini mamahimo nilang magamit aron makaangkon ug trabaho sa umaabot.
Usa usab kini ka lakang diin nagpakita ug dakong suporta sa ‘Build, Build, Build Program’ ni Presidente Rodrigo R. Duterte diin makaangkon ug libre nga assessment ang mga construction workers.
Ang TESDA sulod sa 24 ka tuig padayun nga nag-awhag sa mga katawhan nga kanunay nga mupahimulos sa mga libreng programa nga ihatag sa gobyerno pinaagi na sa maong buhatan.(TESDA-ZN-CukieM)
Photo(c) TESDA ZDN
