Davao City – Prayoridad karon sa Technical Education and Skills Development Authority (TESDA) nga mahatagan og trabaho ang mga Overseas Filipino Workers (OFWs) nga gipapauli gikan sa nasud Kuwait.
Sa gipahigayong press conference sa Mandaya Hotel kaganihang buntag, gibutyag ni TESDA-XI information officer Mafel Gamale nga magbutang sila og TESDA Desk sa Francisco Bangoy International Airport aron atangan ang mga OFWs gikan Kuwait.
“Nananghid mi karon sa CAAP nga magbutang mi og TESDA Desk kay mag-atang mi sa tanang OFWs, kay ang tanang OFWs nga gustong mag training kay ipa-undergo namo’g training pero i-prioritize kadtong gikan Kuwait,” segun ni Gamale.
Gipasabot sa maong opisyal nga dili nila pugson ang tanang OFWs nga mopailawon og training apan mandatory ang mga migrante nga nawad-an og panginabuhi ilabina ‘tong gikan sa nasud Kuwait.
Dugang ni Gamale nga abli ang 300 ka mga programa sa Technical and Vocational Education Training (TVET) diin mamili lang ang mga migrante kung unsa ang ilang gusto kuhaon.
RadyoMaN Jason Amisola
