Davao City – Magsugod na karong adlawa, Pebrero 27 kutob ugmang adlawa ang National Technical and Vocational Education Training (TVET) Enrollment Day & Jobs Bridging.
Sugdan kini alas 8 sa buntag hangtud alas 5 sa hapon diin ipahigayon kini sa Davao City Recreation Center kun Almendras Gym.
Gitataw ni TESDA-XI information officer Mafel Gamale nga abli ang mga programa alang sa mga kwalipikadong indibidwal apan prayoridad nila ang mga overseas workers nga nag gikan sa nasud Kuwait.
Sa pikas bahin, dul-an usa ka gatos na ang hired on the spot sa 2-day nga special job fair alang sa NCCC mall fire victims.
Gipahigayon ang maongg job fair niadtong adlawng Domingo kutob kagahapong adlawa sa pagpanguna sa Department of Labor and Employment kun DOLE XI diin sumala sa DOLE, 86 ang hired on the spot diin 42 niini ang walk in applicants samtang 40 ang apektadong trabahante sa NCCC mall nga sunog ug 4 ang dependents sa NCCC mall workers.
Tumong sa special job fair mao ang mapangitaan og trabaho ang mga naapektuhan sa dakong sunog sa nasangpit nga mall.
RadyoMaN Renz Barbarona
