Davao City – Walay angay kabalak-an ingon man kahadlokan sa hisgutanang seguridad atol sa kasaulogan sa mga aktibidad sa 34th Kadayawan Festival.
Sumala ni Davao City Police Office (DCPO) head PSSupt. Alexander Tagum, hugot nilang ipatuman ang Oplan Bakal Sita ug Oplan Kapkap dinhi sa syudad ilabi na sa mga dagkong aktibidad sama sa Indak-indak sa Kadayawan.
Dugang niini nga sutaon sa kapulisan ang kadudahang tawo alang sa mga posibleng paghupot og IEDs.
“Wala tayong ikatakot beacause we are here to celebrate Kadayawan,” awhag ni Tagum sa katawhan.
Giklaro usab ni Task Force Davao head Col. Consolito Yecla nga walay direktang hulga nga namonitor atol sa kasaulogan sa Kadayawan.
Hinuon gipaniguro niini nga kanunay silang nagapatuman og hugot nga inspeksyon sa mga entry points sa syudad aron maseguro nga walay makasulod nga dautan aron gubaon ang kalipay sa kasaulogan sa maong aktibidad.
Samtang gibutyag ni Public Safety Security Command Center Deputy head Angel Sumagaysay nga dunay kapin 27,000 ka mga security forces ang gideploy sa tibuok bulan sa Agosto aron mapaneguro ang kahapsay ug kalinaw sa matag aktibidad sa Kadayawan.
RadyoMaN Jason Amisola
