TFD: No loading sa bus stops padayong irekomenda

Davao City – Wala gipaubos sa Task Force Davao (TFD) ang gipatumang seguridad sa syudad diin padayon gihapon nga gipatuman ang no loading sa mga pasahero sa bus stops sa dakbayan diin kinahanglan nga sa Davao City Overland Transport Terminal (DCOTT) manukad ang mga biyahero.

Sa interbyu sa DXDC RMN Davao kang Colonel Darren Comia, commander sa TFD, gibutyag niini nga kinahanglan nga padayon nga ipatuman ang nahisgutang direktiba alang sa seguridad bisan og walay direktang hulga ang Davao batok terorismo.

“Patuloy natin itong irerekomenda na talagang no loading parin (sa bus stops). Doon pa rin sa DCOTT (sasakay),” sulti ni Comia.

Matud ni Comia, human sa seguridad nga gipatuman niadtong inagurasyon ni Vice President-elect Sara Duterte-Carpio, gipangandaman na usab karon ang seguridad kauban ang Davao City Police Office (DCPO) alang sa oathtaking ni Davao City Mayor-elect Sebastian “Baste” Duterte sa Lunes (June 27, 2022).

Gawas niini, gipangandaman na usab ang seguridad alang sa uban pang aktibidad sama sa face-to-face Kadayawan sa Davao.

RadoyMaN Kirby Manzon