El Task Force Zamboanga (TFZ) na encavesamiento de Col. Leonel Nicolas y Zamboanga City Police Office (ZCPO) bajo superviccion de Senior Supt. Neri Vincent Ignacio ya convini aura para descuti el manera de seguridad aserca el venedero conducta del grande celebraccion na ciudad de Zamboanga, el Zamboanga Hermosa festival 2017.
El mencionao security meeting concentrao na mga modo del disposiccion del diila cada cualan mga tropa y el coordinaccion sila hay hace con losdemas mga ahencia local y mga volunteer civic-orgnanizations que ya expresa diila suporta na mensyonao actividad.
Mismo el TFZ commander Col. Nicolas ya invita con el liderato del policia para conduci el tal junta na Task Force Zamboanga Headquarters na Camp Arturo Enrile, Malagutay.
Initialmente, el military y policia chene ya cuantos mga mejoras de seguridad que ya prepara y pendiente el implementaccion para na Hermosa Festival 2017.
Querre asegura el otoridad cay nuay algo soceso que hay ocuri durante el un mez celebraccion.
De mas temprano este semana, ya anuncia ya el otoridad cay sigui syempre sila con el antes poliza de privini el usada del mga hooded jackets, bull caps y backpacks na mga lugar donde hay conduci mga actividades del fiesta, lo mismo el matanza del cignal del mga linya de comunicaccion el tiempo del prosisyon pinal na dia del Fiesta Pilar na Octubre Dose. – *Bhong Simbajon/RMN News*
