Ginkakabarak-an yana han Philippine Institute of Volcanology and Seismology o kun PHIVOLCS nga posible maglinog o kumiwa an Philippine trench ha Region 8 ngan magdurot ini hin tsunami ha mga Probinsya nga naatubang ha Pacific Ocean sugad nala han Leyte, Southern Leyte ngan Eastern Samar.
Sumala kan PHIVOLCS Director Renato Solidum, nagdumara na hira hin infromation campaign ha Rehiyon antis pa an paglasurbo han Super Bagyong Yolanda nga kun makusog an pagkiwa hini nga trench ngan umabot ha 7 magnitude lauman daw dayon nga magkakamayada tsunami.
Sumala kan Solidum matatawag liwat ini nga ‘The Big One’ kay pareho an posible kakusgon hini ha the big one ha Manila.
Base ha datos han PHIVOLCS, madugay na nga panahon nga waray kikiwa ini nga Philippine Trench ha rehiyon.
Ginklaro naman ni Solidum nga diri panhadlok ha molupyo an ira intensyon kundi paghatag hin impormasyon para makapagpreparar iton mga tawo
Ha datos nga ginpakita han PHIVOLCS, kun makapag record hin linog an Philippine Trench ha parte han Northern Samar nga aada ha 7.9 magnitude lauman an tsunami ha Eastern Samar nga aada ha 9 meters o 3rd floor building ngan ha Leyte naman in aada ha 4-5 meters.
Kun an linog naman in nabubutnga ha Dinagat ngan Samar lauman an an tsunami ha Leyte nga aada ha 4-7 meters ngan ha Northern Samar in aada ha 8-9 meters.
Pahinumdom han PHIVOLCS, pirmi nga mag andam kun ha sitwasyon sugad hini kakusog it linog nga umigo ha Rehiyon.
