Davao City – Giklaro sa usa ka ministro sa Christian and Missionary Alliance Churches of the Philippines (CAMACOP) nga sa bibliya, walay mabasa nga ‘First Noel’ nga ginakanta panahon sa Pasko sa daghang kanasuran kinsa naghangop sa tinuhoang kristiyanismo.
Matud ni CAMACOP Minister Dr. Ira Lee Rosalita, ang bibliya wala nagbutyag sa pulong nga ‘First Noel’ nga gi-awit panahon sa Pasko ug misikat niadtong 18th century ug gani hangtud karon, nagpabiling paboritong alawiton sa tanan matag sugod sa Yuletide season.
Ang synoptic gospel kun upat ka libro sa Maayong Balita sa Bag-ong Kasabutan kun New Testament wala maghisgot sa duha ka pulong nga ‘First Noel’ gawas sa pulong nga ‘Emmanuel’ nga mabasa sa Matthew 1:23 nga nagpasabot nga ang “Diyos uban kanato”.
Ang pulong nga ‘Noel’ (Christmas Season) naggikan sa old French nga “Nael” gikan sa hinubad nga Latin word nga “Natalis’ nga nagpasabot og pagkahimugso kun ‘birth’ nga gisulat ni Davies Gilbert ug gi-arrange ni William Sandys niadtong tuig 1833.
Sa theolohikang pagtuon ni Rosalita, ang Pulong nga “El” sa ‘Noel’ nagrepresenta sa ngalan sa Diyos sama pananglitan sa ‘El Shaddai.’
Giingon ni Rosalita nga sa Daang Kasabutan, ang pamaagi sa Diyos sa paghatod og mensahe gipaagi sa mga propeta apan sa Bag-ong Tugon, ang pamaagi sa Ginoo sa pagmantala sa iyang maayong balita mao ang pagpadala sa iyang bugtong Anak nga si Hesu-Kristo.
Pinasahi ang pagkatawo ni Hesus sa kalibutan kay gilalang kini sa Balaang Espiritu nga miabot sa tago-angkan ni Maria nga usa ka dalagang ulay ug pangasaw-unon ni Jose nga kaliwat ni Haring David.
Busa, nagtoo ang maong ministro nga mao kini ang buot ipasabot sa nagsulat sa kanta nga ‘First Noel’ apan gi-usab og paklaro niini nga ang titulo sa naasoy nga awit, wala mahisulat sa Balaang Kasulatan.
Kun aduna ma’y angay panghinauton ang matag indibidwal niining panahon sa Pasko, kana dili ang regalo ug kalipay nga mahatag sa mga minahal sa kinabuhi ug sa mga kabanay ug sa mga kahigalaan apan ang tim-os nga gugma ug kinabuhing walay katapusan nga libreng gitunol ug gigasa sa Diyos alang sa tanan.
Ang pinakamaayong mahitabo sa direksiyon nga angay tahakon sa matag usa sa pagsulod sa Bag-ong Tuig 2020 mao ang pagtuman sa kabubut-on sa Kahitas-an ug mangalagad nga matinud-anon sa Diyos uban ang tibuok pamilya aron makabaton og igong bili ang mensahe sa selebrasyon sa Pasko nga maoy hinungdan nganong nagpakatawo sa kalibutan ang Ginoo.
RadyoMaN Joel Viray
