Isa ka tuig na ang nakalipas… isa ka tuig na nga pagpangita sang hustisya para sa mag-asawa nga ginakabig drug lord sa Western Visayas, si Melvin kag Meriam Odicta.
Agosto 29, 2016, pasado ala una sa kaagahon, ginluthang ang mag-asawa nga Melvin kag Meriam Odicta sa Caticlan Jetty Port, sa Aklan.
Ginpahayag ni Atty Gualberto Cataluña, abogado sang mag-asawa nga Melvin ‘Boyet’ Odicta kag Meriam Odicta, matapos nga nakadungka ang ginasakyan nga barko snag mag-asawa halin sa Batangas, nabatian nila ang 5 ka asud-asud nga lupok.
Una nga gintiro si Meriam Odicta nga may igo sa likod.
Patay on the spot si Meriam.
“Sa pagpanaog ni nila sa barko … pagpanaog lapit pa lang sila sa barko , ginluthang dayun una si Meriam igo sa likod tumba dayon… si Melvin Odicta Sr., ginluthang pero nakacover waay siya dayon maigo, sa tiil lang siya naigo.”
Gintiro man sang wala makilala nga gunman si Melvin Odicta apang naka-cover pa ini kag na-igo lang sa tiil.
Suno kay Cataluña, nakita nila nga duguon si Melvin, nakatawag pa ani sa iya kag nagapangayo sang bulig. Gilayon ini nga ginkadtuan sang mga pulis kag ginkarga sa patrol agud dal-on sa ospital.
Upod ang anak nanday Melvin kag Meriam Odicta nga si Melvin Odicta Jr., ginsunod nanday Atty. Cataluña ang patrol car nga nagakarga kay Melvin Odicta apang nagtalang sila.
“After about few minutes nagtawag si Melvin sa akon nga attorney sugata niyo ko di sa sulod may igo ako sa tiil kay ginkordon na sang pulis waay sang nagakasulod , ginpagwa na ang tanan nga tawo nga halin didto sa sulod. Didto sa sulod gintiro [muh]. Nakita namon nagapadulong nagapagwa na ang patrol nga ara si Melvin Odicta nga ginapusasan sa babaw patrol, gatindog pa siya kag ang isa ya, daw wala nga tiil daw ginabayaw niya , amo to siguro ang may pilas.”
Imbes nga sa malapit nga ospital dal-on, gindala si Melvin sa Malay District Hospital, isa sa mga pinakalayo nga ospital halin sa Caticlan Jetty Port.
Pag-abot sa ospital, nahibaluan na lang nga patay na si Melvin kag may igo sang bala sa ulo.
4 ka adlaw antes natabo ang pagpatay sa mag-asawa nga Odicta, nakigkita pa ang mga ini kaya nay DILG Secretary Mike Sueno agud ihambal kon sin-o ang mga involve sa illegal drug activities sa Iloilo.
Agosto 28 sang gab-i sang nakuhaan ang mag-asawa sang mga matag-as nga kalibre sang armas sa Batangas port. Ginpabilin ang mga narecover nga mga armas lakip na ang ila salakyan. Nagpauli ang duha sakaya sa barko kag pagka-aga natabo na ang pagluthang sa ila.
Ginpahayag ni Sueno nga nangayo si Meriam Odicta sang pila ka tinion agud kuhaon ang matrix nga ila ipresentar apang bangud masako siya, iya ginpanugyanan ang mga Odicta nga magderetso na lang sa CIDG kag didto isugid ang ila nahibaluan .
Suno pa sa iya nga posible may war among drug lords ang mga Odicta rason nga natabo ang pagpatay sa mag-asawa.
Tubtob subong, palaligban sa gihapon kon sin-o ang nagpatay sa mag-asawa nga Melvin kag Meriam Odicta.
