Pagadian City – Patay ang usa ka 37 anyos nga lalaki sa pagpamusil kagahapon sa alas 4:40 ang takna sa hapon sa atubangan sa Best Emporium Benigno Aquino Street, Santa Lucia District ning syudad sa Pagadian.
Ang biktima naila nga si Daryl Salvador Ortiz, 37 anyos, minyo, moneylender kon tigpahulam ug kwarta, ug residente sa Purok Malipayon, San Francisco District, Pagadian City.
Sa imbestigasyon sa kapulisan gibutyag nga 04:40 ang takna sa hapon kagahapon, ang biktima kauban sa iyang asawa nga si Mary Joy Lapar Ortiz, 34 anyos, nagstandby sa atubangan sa Best Emporium Mall arun sa pagpaningil sa mga utangan sa ilang moneylending business.
Ang biktima nagtindog ug nagtan-aw sa mga drivers nga kasagaran iyang mga cliente, sa kalit usa ka wala mailhing lalaki nga nagsuot ug itom nga jacket, nakabonnet ug naka sunglass ang sa walay langan mipusil sa likod sa biktima gamit ang usa ka Calibre 45 nga pistola. Human sa maong incidente, ang suspetsado daling misibat sakay sa usa ka Honda TMX 155 single motorcycle color itom paingon sa Benigno Aquino Street, Pagadian City.
Ang biktima daling gidala sa mga miresponding kapulisan sa Pagadian City Medical Center (Mendero Hospital).
Nakuha sa dapit nahitabuan ang unom ka basiyo sa bala sa Calibre 45 pinaagi sa personahe sa SOCO.
Samtang sa pagka alas 6 ang takna sa gabie sa maong adlaw, ang biktima gibugtuan sa iyang kinabuhi.
Ang patayng lawas gihaya na karon sa pinuy-anan sa iyang ginikanan sa San Isidro, Labangan ug padayun pang nagpahigayon ug hot pursuit operation ang kapulisan sa Pagadian arun madakpan ug masuta ang motibo sa naasoyng pagpamusil.
