Davao City- Nakaplagang wala nay kinabuhi ang usa ka tigulang sulod sa girentahan nga kuwarto niini sa Purok 5 Brgy 1-A Bolton, siyudad sa Davao.
Subay sa report gikan sa Davao city Police Office (DCPO) nailhan ang biktima nga usa ka alyas Danny/Tatay, anaa sa pangidaron nga 50 o 60 anyos , usa ka ice cream pop vendor ug residente sa nasangpit nga lugar.
Sa gilusad nga imbestigasyon sa San Pedro PNP, sumala sa kauban niini nga renter nga si Joseph Ybañez nga ilang nakita ang biktima niadtong April 28 alas 9:35 sa buntag nga padulong pa sa gitrabahuan apan pagbalik sa biktima alas 10:15 sa gabii didto namatikdan nga gipadlakan na ang gawas sa kuwarto sa biktima.
Giingon ni Ybañez nga kagahapong adlawa, Abril 30 namatikdan nga dili maayo nga baho sa maong kwarto ug aduna nay fluids nga nigawas gikan sa maong lawak nga girentahan sa biktima hinungdan nga giabrihan sa care taker sa maong boarding house ang kawarto ug didto nadiskobrehan ang patayng lawas sa biktima nga wala nay kinabuhi ug niburot na matud pa ang lawas gani padulong na sa pagkadugta.
Padayong ginasusi sa Scene of the Crime Operatives kun SOCO ang hinungdan sa pagkamatay sa biktima gani ipailawom matud pa kini og otopsiya samtang ang kapolisan padayon naglusad og imbestigasyon aron masuta o mailhan ang kompletong identity sa biktima.
RadyoMaN Don Pulayao
