Davao City – Prayoridad sa mga Barangay Tanod sa Brgy. 9-A ang paghatag og seguridad sa mga lumolupyo busa halos 24 oras ang ilang roving sa ilang area of responsibility.
Matud ni team leader Kadong Carabal nga buot nilang luwas ang ilang mga residente gikan sa hulga sa mga kriminal kun dautang mga tawo panahon sa kagabhion.
Segun ni Carabal, ang ilang presensiya sa nagkadaiya nga purok dakong tabang aron masanta ang krimen sa ilang dapit nga sagad mahitabo sa kagabhion ug sa kadlawon.
Ug mao kini ang rason ngano nagapulaw silang tanan matag gabii apan wala nila kini gisapayan sa ngalan sa tawhay nga pamahuway sa ilang mga residente matag gabii.
Dili malimod nga limitado ang puwersa sa kapulisan alang sa 182 ka barangay diin kakulangon kini sa bahin sa mga otoridad kung unsaon pagmentinar ang hugot nga seguridad nga gilauman sa mga tawo.
Ang barangay level giisip nga first liner sa kapulisan diha sa pagbantay sa seguridad ug pagsanta sa kriminalidad busa aktibo gayod sa roving ang mga tanod sa daghang mga barangay sa dakbayan.
Suma ni Carabal nga mahimong luag ug haw-ang ang seguridad sa barangay kung walay pagtinabangay ang mga tanod ug ang mga pulis diha sa pakigbatok kontra kriminalidad.
Subay ani, gidepensahan ni Kadong ang kapulisan gikan sa batikos sa publiko human sila malutsi sa pipila ka kriminal diin giluba patay ang taxi driver, gipamusil ang estudyanteng babaye ug gisulod sa balay ang usa lalake.
Segun ni Carabal nga dili gyod malikayan nga malutsan og kriminal ang mga otoridad sanglit sila raman usab bantayan busa bisan pa og piluon ang implimentasyon sa security measures malutsan gayod gihapon sila.
Dugang ni Carabal nga ang epektibong pamaagi sa pagsumpo sa krimen mao ang pagtinabangay sa katawhan ug sa kapulisan pinaagi sa hiniusa nga paningkamot sa pag-alkontra sa kriminalidad nga mahitabo panahon sa kagabhion sanglit ang kangitngit mao ma’y kinaham nga oras tiglihok sa mga kawatan ug uban pang kriminal.
RadyoMaN Joel Viray
