Malay, Aklan – Natigayon nga ma- recover it mga miyembro kung Malay PNP Operatives sa pagpanguna ni PCAPT. Dexter Brigido rong backpack nga may sueod nga 2.7 milyon pesos sa ginadyunan it suspek kaina it alas 2:00 rong aga-aga sa Sitio Hagdan, Brgy. Balabag, Boracay.
Sa ginpatigayon nga hot pursuit operation, na aresto rong suspek nga si Leandro Sarito, 24-anyos, taga Odiongan, Romblon, dating empleyado it sangka Korean ag tag-ana it money changer ag temporary nga naga dayon sa Sitio Hagdan.
Sa na-recover nga backpack hay may mga sueod raya nga sangka puea ag uwat sueod nga cash box, Sterling Bank Check Book, Pass Book ag cash nga naga abot sa Php2,399,000.00.
Samtang sa ginpatigayon nga inventory kaibahan ro tag reklamo, boyfriend it tag reklamo ag rong suspek hay nasayuran nga kueang eon raya it Php 301, 000.00.
Kung matandaan nga ginreport sa Malay PNP ro pagkaduea ko nasambit nga backpack ko Agosto 7 kung sa siin ginapanag-iyahan raya it Golden Moon Foreign Exchange Services Money Changer nga nahamtang sa Sitio Manggayad, Brgy Balabag Boracay.
Ag sa pag imbestiga ag pag-review ko mga CCTV footages it mga kaiping nga establisyemento hay nakita rong nasambit nga eaeaki nga naka jacket it itom nga may hood ag may dae-daea nga backpack.
Si Sarito hay una eon makaron naka detained sa lock up cell it Malay PNP samtang gina preparer rong kaso nga igapasaka kuntra kana.
