Base sa footage, perting bisiha sa pag-atiman sa mga customers ang tindera nga giilang si Vivian Atienzar ug residente sa nasampit nga barangay dihang usa ka lalake ang misulod sa tindahan ug nagpaka-aron-ingnon nga customer sab.
Segun ni Atienzar, magpa-cash out og 5,700 gikan sa GCash ang suspek ug tungod kay daghang gitagad ang maong tindera nga mga customers, giharag diritso ni Atienzar ang kapin 5,000 ka pesos ngadto sa suspek.
Nakita ang pagdawat sa suspek sa kwarta, apan kalit nga gikanselar sa mangingilad ang transaksiyon ug dayon sibat sakay sa iyang motorsiklo nga wala pa mabalhin sa tindera ang kwarta gikan sa GCash sa suspek.
Naklaro sa kuha sa camera ang plaka numero 992 LUC sa raider motorcycle nga gigamit sa suspek diin malaumon ang complainant nga masubay sa LTO XI ang tag-iya sa motor ug mailhan sa kapulisan ang lalake nga misalisi kaniya.
Pahimangno sa mga otoridad sa publiko hilabi na sa mga mangdawat og cash out sa GCash nga mag-igmat batok sa samang modus operandi ug sigurohon nga ma-transfer ang kwarta sa GCash una tunolan og cash ang mga buot mag-cash out.
RadyoMaN Joel Viray
