Patok sa mga netizens ang kakaibang souvenir para ipamigay sa mga bisita na dumalo sa isang binayagan.
Sa ibinahaging post ng facebook user na si Abby Sombilon, makikita ang larawan ng isang ginawang souvenir na mayroong lamang tatlong pirasong lumpiya sa loob ng sisidlan na may asul pang ribbon.
Sabi ni Sombilon sa kanyang caption, “Wag na mag-cupcake giveaways. Mag-shanghai na lang! Kanin na lang ang kulang.”
Makikita rin sa loob nito ang sticker na may nakalagay na “Thank You for Coming” at ang pangalan ng batang bininyagan.
Agad na umani ng napakaraming reaksyon ang post ni Sombilon na kasalukuyang umabot na sa mahigit 5,000 likes at 10,000 shares sa facebook.
Itituring na magandang pribilehiyo para sa mga ninong at ninang ang matatanggap nilang ‘lumpiang shanghai souvenir’ para raw hindi na nila kailangan pang makipag-agawan ng lumpia sa ibang mga bisita.
