Ginpriso man sang kapulisan ang tiyo sang suspek sa pagpatay sa pito ka tuig nga bata sa Victorias, Negros Occidental sang Dominggo nga adlaw bangud sa kaso nga obstruction.
Detain sa prisuhan sang Ajuy PNP si Napoleon Besa, 73 anyos sang Pili, Ajuy, Iloilo matapos madakpan sa iya kustodiya ang suspek nga si Mark Besa nga karon didtgo na sa Victorias PNP.
Subong man, ginpahayag sang tigulang nga natingala siya nga ginpriso siya sang kapulisan bisan pa nga gintudlo niya sa mga otoridad ang ginpanaguan sang iya hinablos.
Sa pagsaysay sini, iya ginpahayag nga alas 7 kahapon sang aga nag-abot ang iya hinablos nga si Mark Besa kag wala gid siya ideya nga nakahimo ini sang krimen sa Negros.
Ulihi na sang iya nahibaluan nga nakapatay ini sang bata sang manawag ang iya pamilya sa Negros kag namangkot kon ara sa iya ang suspek kag sang iya ginhambal nga ara, ginhambalan siya nga ipadakop sa pulis bangud nakahimo ini sang krimen.
Bangud sini, ginpahayag sang tiyo nga ginhambalan niya ang ila kasilingan nga si Lorie Aspero nga magtawag pulis agud ipadakop ang iya hinablos.
Subong man, wala na sa ila balay ang suspek sang mag-abot ang mga pulis kabangdanan gin-updan niya ang mga ini sa kasagingan nga posible panaugan sang suspek kon sa diin didto ini nakita kag nadakpan sang kapulisan.
