Davao City – Gipatin-aw karon ni Archbishop Emeritus Oscar Cruz sa Catholic Bishops Conference of the Philippines (CBCP) nga bukas ang ganghaan sa simbahang Romano Katoliko sa cremation silbing cadaver disposal procedure.
Sa iyang pamahayag sa morning primetime radio social commentary program nga ‘Straight to the Point,’ gibatbat ni Cruz nga na-realisar sa simbahan ang mga rason pabor sa cremation sama sa naggu-ot na nga mga sementeryo, kahu-ot sa panakayan ug uban pang rason nga ang mga tagtungod ma-inkumbinyente panahon sa ‘Todos Los Santos’ o ‘Kalag-Kalag’ matag Nobyembre 1 ug 2.
Hinoon, gitino sa nahimo usab nga Judicial Vicar sa CBCP nga adunay mga kondisyones sa nasangpit nga katugutan. Usa niini mao nga ang ‘cremains’ kun abo sa atong mga pinalanggang nitaliwan na sa laing kalibutan dili ibilin lamang sa panimalay, isalibay ngadto sa kadagatan or asa bang dapita ug dili bahin-bahinon sa mga tagtungod nga daw i-plastar butang nga walay bili.
Ang simbahan uyon sa proseso apan sa rekwisito nga ang abo angay gayud magpabiling nahimutang diha sa mga ‘cinerary or funeral urns’ kun saluranan ug i-plastgar ug maayo diha sa mga ‘columbarium’ nga adunay mga vaults o niches kansang katuyuan mao ang paghatag ug igong bili ngadto sa memorya sa mga minatay, segun kang Cruz.
RadyoMaN June Duterte
