Davao City – Gibanatan sa usa ka kritiko ang One Strike Policy sa pagbalik sa Oplan Tokhang gumikan kay magpagubot lamang kini sa organisasyon sa nasudnong kapulisan.
Gibatikos ni kanhi Anad Partylist Representative Jun Alcover ang Oplan Tokhang tungod magresulta lang kini sa kagubot sa kapulisan bisan pa og dunay guidelines ang implementasyon ani.
Gipangagpas na daan ni Alcover ang kaguliyang sa hanay sa kapulisan tungod sa posibilidad nga mataktak sila sa serbisyo gumikan sa one strike policy sa Oplan Tokhang.
Gitindugan ni Alcover nga sa sinugdanan pa lang sa implementasyon sa Oplan Tokhang sayop na daan kay wala kini nahisubay sa balaod busa iligal kini sanglit mayatakan ang katungod sa mga gidudahan.
Gilantaw sa Anti-Communist Leader ang posibilidad nga gamiton sa ubang pulis kini nga operasyon aron binuangan ug dauton ang kapwa otoridad ug aron mataktak sa serbisyo gumikan sa pangugbo sa trabaho.
Busa gipabudlat sa kanhi magbabalaod ang mata ug panghunahuna sa kagamhanan aron ma-antisipar ang negatibo nga epekto sa one strike policy subay sa pagbalik sa oplan tokhang dinha sa hanay sa PNP.
Alang ni Alcover wala na gikinahanglan ang Oplan Tokhang diin ang buhaton lamang sa kapulisan mao ang pagsunod sa kun unsay nakalatid sa balaod diha sa pagpitol sa mga tawo nga misawom sa bisyo sa droga.
Giyagyag ni kanhi Anad Partylist Representative ang sekreto sa pagtuldok sa suliran sa droga ug kung matuhog sa kapulisan sisiw ra kaayo kanila ang pag-ayo sa makamatay nga kanser nga miigo sa kabataan ug sa hamtong kansang nagpakabuang sa bisyo droga.
RadyoMaN Joel Viray
