TACLOBAN CITY – Ginmartilyo na ginsarutso pa, ini an naangkon han usa nga Tomeco Enforcer matapos nga pasakitan hiya han mga construction workers ha Rotonda Coca-Cola, Brgy. 76, Fatima, Tacloban City.
Basi ha report han Tacloban PNP Station 1, ginkilala an Tomeco Enforcer nga hi Elmer De Paz Cabaluna, 38 anyos, residente ha brgy. 56 pericohon, tacloban city.
Ginkilala naman an mga suspek nga hira Ryan Contalba Alvarico, 34 anyos, usa nga karpentero, residente ha Brgy. 64 Sagkahan; ngan hi Raymond El Monte Cantina, 37 anyos, usa nga paintor, residente ha lumbang 1, Brgy. 96 dinhi ha tacloban.
Sumala kan PCInsp. Alex Echon, Tacloban PNP Station 1 Commander, away ha kakalsadahan an nahinabo. Ginsaway han Tomeco Enforcer ini nga mga construction worker nga sakay hiton pedicab dida han huwebes alas 8:00 han gab-i.
Diri na duty an tomeco enforcer hito nga mga oras sumala kan PCInsp. Echon.
Nagdebate ngan umabot ha punto nga an mga dara nga gamit han mga constrction workers sugad han martilyo ngan sarutso an gingamit para pasakitan an enforcer han TOMECO.
Ginpukpok hin martilyo an ulo ngan may mga samad an lawas han tomeco enforcer, gindara naman dayon hiya ha hospital.
Nadakop dayon han mga kapulisan an mga suspek ngan paslak na ha Tacloban Pnp Station 1 Lock Up Cell.
Physical injury an kaso nga ipapasaka kontra ha mga suspek.
