TACLOBAN CITY – Ginbuno han iya la mismo sangkay kasanggab-i hi Jerolan Abrea, 24 anyos, may asawa ngan residente ha Purok 2. Brgy. Bagacay syudad han Tacloban.
Ginkilala naman an suspek nga hi Jericho Nolasco, 29 anyos, may asawa, usa nga TOMECO Enforcer ngan residente gihap han mao nga lugar.
Base hiton inisyal nga imbistigasyon han Tacloban City Police Office station 2, nagdedebate an suspek ngan an iya asawa hadto nga gab-i samtang an biktima in mapalit unta hin irimnon upod iton iba pa niya nga mga sangkay. Ha pag-agi niya ha panimalay han suspek in tigda nala hiya ginbuno.
Naangkon han biktima an binun-an ha pira nga parte han iya lawas ngan hiya naman dayon in gindara ha EVRMC para matambal.
Sumala kan TCPO station 2 Deputy Chief PSInsp. Edwin Canamaque, attempted homicide an maipapasaka nga kaso kontra ha suspek.
Ha pahayag han TCPO station 2, madepende ha pamunuan han TOMECO kun mayada pa trabaho nga maaabtan an suspek kun ha sitwasyon nga mapag-bail ini.
Ha pagka yana, paslak na an suspek ha mao nga police station.
