Davao City – Usa sa dakong giatubang nga problema karon sa Pilipinas mao ang tonelada nga mga basura nga makolekta matag adlaw diin wala pa’y teknolohiya ang nasud sa pagsulbad niini.
Dinhi sa Davao City, liboan ka tonelada sa basura ang ginalabay sa dumpsite ug gani lakip ang kadagatan ginahimo na sab nga tambakan sa basura sa mga tawo.
Ang paglabay og tonelada nga basura sa dumpsite sa siyudad dili lang magkuntaminado sa tubig dagat apan lakip na ang kahinganan nga mudaot unya sa ozone layers.
Suma ni Department of Environment and Natural Resources (DENR) consultant Candido Aparece Jr., alarming na kini apan ang katawhan walay pagpakabana sa waste segregation diin muabot unya ang panahon nga wala nay kabutangan ang siyudad sa basura.
Ang kapakyasan sa mga barangay opisyal sa ilang trabaho diha sa istritko nga implimentasyon sa waste segregation nagpatig-a sa ulo sa mga tawo sa pagsunod sa paglabay sa sakto sa basura.
Kun padayon magpalingog-lingog ang mga barangay opisyal sa ilang trabaho magpabilin nga numero nga labad sa lokal nga kagamhanan ang problema sa basura.
Ug aron mapugos og lihok, mas maayo dut-an og kaso ang mga opisyales nga wala muhimo sa ilang responsibilidad sa pagpatuman sa waste segregation sa ilang mga barangay.
Didto sa Germany karon, aduna silay teknolohiya nga ang basura puwede na mahimong enerhiya diin dili lang nasulbad ang suliran sa basura apan nakabenepisyo pa ang mga industriya ug ang mga panimay.
Gikumpirma ni Aparece nga ang lokal nga kagamhanan naghan-ay sab og susama nga programa diin sa tukma nga panahon i-anunsiyo kini mismo ni Mayor Inday Sarah Duterte-Carpio.
Gibutyag sa consultant sa DENR nga kun makabaton og teknolohiya ang siyudad sama sa Germany mahuman na ang problema sa dakbayan ug dako kini ikatabang sa pagpreserba ug pagpanalipd sa kinaiyahan sa siyudad sa Dabaw.
RadyoMaN Joel Viray
