Davao City – Gi-aresto sa hiniusang pwersa sa Philippine Drug Enforcement Agency (PDEA) ug Panabo City Police Station ang Top 1 drug personality sa Davao del Norte Target List pinaagi sa search warrant alas 7:15 sa gabii kaniadtong Abril 26, 2018 nahitabo sa Phase 2, Purok Ubas kanto sa Melon ug Strawberry Streets, Niceville Subdivision, Brgy. Cagangohan, Panabo City, Davao del Norte.
Sa record sa PDEA-XI, ang dinakpan giila nga si Carlito Salvador Wong, 59 anyos, minyo, kanhing police officer ug lumulupyo aa nasampit nga lugar.
Nakuha gikan sa gikunsiderang high value target ang upat ka mga pakete sa shabu nga adunay kabug-atong 25 ka gramo nga nagkantidad og 375,000 ka pesos, usa ka pakete sa marijuana ug uban pang drug paraphernalia sulod sa iyang panimalay.
Balhog na karon sa detention cell sa PDEA-XI si Wong ug muatubang sa kasong kalapasan sa Sec. 11, Sec. 12 ug Sec. 15 ilawom sa R.A. 9165 kun Comprehensive Dangerous Drugs Act of 2002 batok kaniya.
RadyoMaN Jason Amisola
