Malampusong nasikop sa mga operatiba sa City Drug Enforcement Unit kon CDEU ang usa ka 19 anyos nga lalaki tungod sa pagpayuhot sa iligal nga druga. Kini atol na sa anti-illegal drug buy bust operation nga gilusad diha sa Zone 4, Brgy. Bugo ning syudad sa Cagayan de Oro.
Naila ang dinakpan nga 19 anyos nga si Jayrel Jade Paler Rocero, ulitawo nga walay trabaho ug residenti sa nasangpit nga lugar. Nasayran nga naa sa watchlist ang maong dinakpan nga tigpayuhot sa iligal nga druga sa ilang lugar.
Napalitan sa usa ka sachet sa gituhoang shabu balor 500 pesos ang suspek nga maoy hinungdan sa pagka-aresto ni-ini.
Atol sa pagrekisa, narecover pa gikan sa suspek ang laing 2 ka sachet sa gituhoang shabu ug ang 500 peso bill nga ginamit isip buy bust money.
Gibana-banang motimbang sa 1gram ang tanang nakumpiskang kontrabando gikan sa suspek nga dunay street value nga 6,800 pesos.
Samtang atol sa pagduki-duki sa mga personahe sa CDEU, nasayran nga TOP 6 most wanted person sa Regional Level diay ang ilang nasikop ug duna kini pending warrant of arrest.
Diha-diha dayon ilang gisilbi ang warrant of arrest nga dunay kalapasan sa R.A. 9165 nga gipagula ni Hon. Maria Corazon Llanderal, ang Presiding Judge sa RTC Branch 40 nga pinetsahan niadtong Enero 7 ning tuiga kung diin walay girekomendang piyansa.
Suspetsado karon detinado na sa Maharlika Detention Cell samtang gipaabot ang pag-turnover ni-ini ngadto sa issuing court alang sa tukmang disposasyon.
Kasama mo sa CDEU, RadayoMaN Andy Coco, DXCC Tatak RMN!
