Davao City – Gideklarang dead on arrival sa Southern Philippines Medical Center (SPMC) ang numero unong target sa Sta. Ana Police human misukol atol drug bust operation nahitabo alas 11:25 sa buntag sa may San Guillermo Chapel, Brgy. 22-C, Boulevard ning syudad sa Davao.
Ang suspek giila nga si Ian Laurente Habana, 24 anyos, tricycle driver, lumulupyo sa maong lugar ug sumala pa numero uno sa drug watch list sa mga awtoridad.
Sa gipagulang report sa DCPO, mihulbot sa .38 kalibre sa pistol si Habana aron suwayan og pusil ang poseur buyer apan nakalikay kini ug nibalos rason sa pagkahiagom og samad-pinusilan sa maong suspetsado.
Daling gidala sa kapolisan ang suspect sa SPMC apan nakabsan sa kinabuhi.
Dugang sa kapulisan nga nalambigit usab sa pagpangawat si Habana sa maong lugar.
Sa datos gikan sa Sta. Ana PNP, lima na ang naneutralisa sa kapolisan samtang 12 na ang nadakpan nga napayuhot og illegal nga droga sukad milingkod si Police Chief Inspector Michael Uyanguren isip hepe niadtong bulan sa June 14, 2018.
RadyoMaN Jason Amisola / RadyoMaN Don Pulayao
