Masuwerte nga mga gasgas kag bakiras lamang ang naagum sang duha ka sakay sang topdown nga tricycle apesar nga nahulog ang mga ini sa idalum sang taytay sa banwa sang Duenas, Iloilo matapos ginbungguan sang single nga motorsiklo ALAS 4:25 kahapon sang hapon (Mayo 14).
Ginpahayag ni Police Master Sgt. Reynaldo Laurea sang Duenas PNP nga wala sang naagum nga fracture ang mga biktima nga sanday Julian Macahilo, 45 anyos sang Liboo, Dingle, driver sang topdown nga tricycle kag ang backrider sini nga si John Rey Panes, 18 anyos sang Bacuranan, Passi City.
Suno kay Laurea nga may karga nga puwertahan ang topdown nga tricycle agud idul-ong sa ila kustomer apang pag-abot sa may taytay, binungguan sang single motorcycle nga ginamaneho ni Cyril Plagata kabangdanan nga nadulaan sang kontrol si Macahilo kag nakabunggo sila sa gutter kon sa diin naglupad sila paidalum sa taytay.
Nagtupa sa tubig si Macahilo samtang ang iya backrider nagtupa naman sa mapino nga balas sang suba kabangdanan sang ila naagum nga menor nga kapilasan.
Yara naman sa custody sang Duenas PNP ang driver sang motorsiklo kag nagpahayag sang kahanda sa pagpakig-areglo sa mga biktima.
