Davao City – Gikalipay sa mga residente nga nasunogan sa Waling-waling St., Toril ning dakbayan ang gipahigayong Operation Tabang sa DXDC RMN Davao karong adlawa.
Malipayon nga gidawat ni Raymundo Dion, 57 anyos, residente sa maong lugar, ang hinabang gikan sa Team RMN diin gibutyag niini nga wala kiniy nasalbar bisan usa ka sanina sanglit paspas nikuyanap ang kalayo kagahapon.
Nanawagan si Dion sa lokal nga panggamhanan nga imbes na kwarta mga materyales pangtukod sa balay sama sa sin, kahoy ug lansang na lamang ang itunol kanila aron lamang sila adunay mapuy-an.
“Nanghinaot mi nga maplastar ang among mga pinuy-anan bisan materyales lang gud.. Wala mi nanginahanglan og kwarta kay kung muingon tag kwarta basin muingon sila nga nangwarta lang tag tuyo… Kahoy lang, sin, lansang mao ra gud,” panawagan niini.
Samtang gi-awhag ni Misel Miral-Galve, special projects head sa DXDC RMN Davao, ang publiko nga buot mutabang sa mga nasunogan nga andam modawat ang sibyahan sa mga donasyon sama sa used clothings.
Mamahimo kining ihatud sa 2nd Floor, San Vicente Building, Anda-Bonifacio Sts., Davao City ug mamahimong motawag sa (082) 227-4571 o magtext kaniya sa numerong 0930-631-0871.
Kahinumdoman nga dul-an 50 ka mga panimalay ang naugdaw sa nahitabong sunog kagahapon, Enero 8, diin giingong nagsugod ang kalayo sa napasagdaang niluto.
RadyoMaN Jason Amisola
