Davao City – Giduso karon sa Akbayan Partylist-Davao City ang bilateral agreement tali sa gobyerno sa Pilipinas ug sa gobyerno sa Kuwait una tugotan makabalik og trabaho ang mga Pilipino ngadto sa abroad.
Ang bilateral agreement maoy maghatag og proteksyon sa mga OFWs ilabi na sa mga Domestic Helpers nga dili sila abusohon ug dagmalan sa ilang mga abusadong agalon sa Kuwait.
Gisugyot ni Akbayan Partylist focal person Randy Ponteras ang makuti nga pagrebyu sa mga palisiya aron wala nay mga Pinoy ug mga Pinay mamatay sa Kuwait sama sa nahitabo ni Joanna Demafelis kinsa gidagmalan ug gitaguan sa freezer.
Daw nasayop ang gobyerno sa ora-orada niini nga lakang human gipatuman ang total deployment ban sa Kuwait taliwala nga wala paman matapos ang paglagda sa bilateral tali sa Pilipinas ug Kuwait.
Masabtan sa pamahayag ni Ponteras nga daw malisod na mapursige ang bilateral agreement karon nga na-insulto na ang gobyerno sa Kuwait sa total ban sa nga gipatilaw sa Pilipinas kanila.
Gidugang ni Ponteras nga supak sa pangkalibutanong balaud ang pagkustodiya sa mga agalon sa passport ug pagdili sa paggamit og cellphone sa mga OFWs.
Gidasig ni Ponteras ang mga OFWs nga balik-Pinas na ug buot mubalik og lupad nga dili una manarbaho sa mga nasud sama sa Kuwait kun walay bilateral agreement nga mapirmahan ang pilipinas sa partikukalar nga mga nasud.
RadyoMaN Joel Viray
