TOTALLY BURNED | Mag-iloy, nalakip sa nasunog nga poluy-an sa Brgy Libas Roxas City!

Roxas City, Capiz- Duha ang patay sa pagkasunog sang poluy-an sa Purok Uno Brgy Libas Roxas City kaina sang aga.
Kalakip sa nasunog ang mag-iloy nga sanday Josefa Progio kag 11- anyos nga anak sini nga si Charlotte nga ginakup-an sang iloy.
Ang mga ini ang ginapatihan nga na- suffocate kabangdanan nga wala gilayon makaguha sa balay nga nagakasunog.
Base sa inisyal nga imbestigasyon, nagakatulog na ang magpamilya sang gulpi lamang nga nag-ibwal ang kalayo.
Gintinguhaan pa nga salbaron sang mister nga si Melvin Solis ang pamilya sini apang ang tatlo gid lamang ka mga anak ang natigayon nga mapaguha sa nagakasunog nga poluy-an.
Ginapatihan nga base sa imbestigasyon sang BFP- Roxas, ang napabay-an nga baga halin sa ginsalang nga tinapa ukon smoke fish ang ginhalinan sang sunog.
Insigida nga gindangat sa Roxas Memorial Provincial Hospital ang tatlo sini ka mga kabataan matapos nag-angkon mga paso kag kapilasan sa lawas.
Padayon pa ang imbestigasyon sang mga otoridad sa amu nga insidente.

Facebook Comments