Davao City- Midagsang karong tuiga ang mga turista nga niduaw dinhi sa syudad sa Davao bisan pa man tuod taliwala sa gideklara ni Pres. Rodrigo Duterte nga extended martial law sa Mindanao.
Sa interview sa DXDC RMN Davao kang Generose Tecson, City Tourism Operations Office (CTOO) Head, gisaysay niini nga mihinay ang turismo sa Davao sukad gideklara ang martial law sa bulan sa Mayo apan misaka gikan sa bulan sa Hulyo kutob Oktubre ning tuiga ang ihap sa tourist arrivals.
Dugang ni Tecson nga wala pa nahibal-an ang porsyento kung maayo ba ang dagan sa turismo pag-abot sa Nobyembre ug karong bulana apan tungod sa mga aktibidad nga gitagana sa lokal nga gobyerno sama sa ‘Pasko Fiesta 2017’ kansang tumong mao ang pagdani mismo sa mga taga-Davao nga wala na nakauli.
Dinhi nga mobalik, mga kasilinginan o mga bisita gikan sa kasikbit nga lugar sa syudad ug mga langyaw gikan sa nagkadaiyang nasud.
Segun kang Tecson, bisan kun lugwayan pa ang Mindanao martial law kutob sa 2018, nagtoo gihapon siya nga mutaas pa ang ihap sa mga turista ug dumuduong denhe sa dakbayan.
Sa pikas bahin, base sa record sa City Tourism Office, gawas sa turismo, misaka usab ngadto sa 12% ang negosyo sa 3rd quarter ning tuiga diin namatikdan nga daghang imprastraktura ug daghang negosyo ang gipangmontar karong mga panahona.
RadyoMan Renz Barbarona
