Angayan ug andam na nga ipahimutang sa husto ang nagkadaiyang tourist destinations sa probinsya sa Zamboanga del Norte alang na sa tour package circuit.
Kini ang gipahayag ni Ms. Precious Jane Rebollos, Planning and Product Development Officer sa rehiyunal nga buhatan sa Department of Tourism (DOT) Region 9 atol sa gihimong Zamboanga del Norte Circuit Tour Package Test Run nga nagsugod niadtong Agosto 14 hangtud 26 ning tuiga.
Kini mao ang Dapitan-Sindangan Circuit nga gipasiugdahan sa DOT Region IX inabagan sa kagamhanang probinsyal sa Zamboanga del Norte pinaagi sa Provincial Tourism Office ug gisalmutan sa 20 ka partisipante nga gilangkuban sa academe, tour oparators, local government unit pinaagi sa tourism officers ug marketing in-charge sa nagkalain-laing resorts sa dapit.
Gipasabot ni Ms. Rebollos nga ang tourist destinations and attractions sa probinsya ang dugay nang gidugok sa lokal ug langyaw’ng turista apan angayan kining iplastar aron masayon na unya nila ang paghidangat sa mga dapit nga nahisgutan sa unahan aron mas mapalambo pa ang industriya sa turismo sa lalawigan.
Nasayran nga lakip sa gibisita sa mga partisipante mao ang Dipolog Boulevard, Livelihood Skills Development and Enhancement Center (LSDEC) ug Casa Bernedo sa dakbayan sa Dipolog.
Samtang sa lungsod sa Mutia mao ang Hilander Resort sa Barangay Alvenda ug Manuel’s Resort sa lungsod sa Pinan.
Niadtong Agost 15, ang mga partisipante misubay sa Piñahon Island sa lungsod sa Sibutad, Industrial Companies sa lungsod sa Roxas, Libuton Cave sa Manukan ug lahos sa lungsod sa Sindangan.
Sa Agosto 16, himuon ang Community Immersion and Site Visits sa lungsod sa Sindangan balik sa Butanas Resort sa lungsod sa Sergio Osmeña.
Niini, positibo si Ms.Rebollos nga ang maong mga dapit masulod na sa Tour Package gumikan usab sa kaasgut ug pagsuporta nga gipakita sa mga partisipante.
Hinuon, adunay nakita ang mga partisipante nga angayan i-improbar apan matud pa ni Rebollos nga kini ginagmay lamang .
Ang Zamboanga del Norte Circuit Tour Package gikalatid nga ilusad sa katapusang semana sa bulan sa Setyembre niining tuiga subay sa pagsaulog sa Tourism Month.
