Trabahante nangawat nagmahay

22

Davao City – Namoypoy sa pagmahay ang usa ka trabahante kung ngano nagpadani pa kini sa temptasyon sa pagpangawat sa iyang gitrabahoan sa Old Airport Road, Sasa ning siyudad.

Gibati na og pagbasol si Bryan Kent Espina, 23 anyos, ulitawo, picker ug nagpuyo sa Tibungco sa dakbayan sa Dabaw karon nga nagtingkagol na siya sa selda sa Sasa PNP.

Ang suspek nakuhaan sa iyang bag og Brass Double Lin Hid nga produkto nga mukantidad og 10,000 ka pesos atol sa pagkapkap ni SG Mark Paquera, sekyu sa City Hardware Warehouse 5:50 sa hapon.

Daling nakapangayo og Police Assistance sa Sasa PNP ang Supervisor sa warehouse nga si Jeffrey Limpo aron i-indosar ang suspek alang sa dugang nga disposition.

Giangkon ni Espina nga ikaduha na kini nangawat sa iyang gitrabahoan apan nakalusot siya sa unang higayon busa nahiagam kini sa paghimo sa ingon sa pagtoo nga dili gihapon siya masakpan.

Gidason sa suspek nga nabuhat niya ang pagpangawat tungod sa panginahanglon sa tambal alang sa iyang pag-umangkon nga nagsakit.

Giingon ni Espina nga iyang suwayan og pakiluoy sa tagdumala nga dili ipadayon ang kasong Qualified Theft batok kaniya apan kung dili madala iya na lamang atubangan ang asunto.

RadyoMaN Joel Viray

Facebook Comments