Trabahante sang isa ka advertising company, nakuryente samtang nagatakod sang signage sa isa ka hardware sa Brgy Lawaan!

Roxas City, Capiz – Padayon nga ginabulong sa isa ka pribado nga ospital diri sa syudad sang Roxas ang 56-anyos nga trabahante sang isa ka advertising company matapos ini ang nakuryente alas 9:58 sang aga samtang naga-obra sang signage sa isa ka hardware sa Brgy Lawaan, Roxas City. Nakilala ang biktima kay Arnel Boring y Rebana, residente sang Araneta Avenue, Quezon City nga nag-angkon sang mga paso sa lawas. Suno sa kaupod sini nga si Daniel Alvaresi, 22-anyos sang Barangay Lawaan, nagpangayo sang metal material ang biktima nga amu kuntani ang itakod sa ginaobra nga front signage sang aksidente nga nasalapay ang primary line sang CAPELCO kabangdanan sang pagkakuryente ni Boring kag pagkahulog sini.