Davao City – Duha (2) ang angol human sa disgrasya tali sa usa ka Bao-bao (Bajaj) ug trailer truck sa Barangay Dawan, Mati City, Davao Oriental, pasado alas-12 kagahapon sa udto (September 17, 2021).
Sa interbyu sa DXDC RMN Davao kang Patrolman Al Lalang, traffic investigator sa Mati PNP, giila niini ang biktima ug driver sa Bao-bao nga si Roy Jones, 49-anyos, usa ka langyaw ug alalay niining minor de edad, pulos residente sa Lupon, Davao Oriental.
Saysay sa investigator nga gikan Mati padulong Lupon ang Bao-bao samtang gikan Davao padulong Mati ang trailer truck nga gimaneho si Paul Kevin Saligumba, 29-anyos, taga Malaybalay City, Bukidnon, diin pag-abot sa kurbada nga bahin, tungod sa dili pantay nga dalan, natagak ang ang pipila ka sako sa semento nga karga sa trailer truck ug mipaingon kini kasugat nga Bao-bao.
“Pag-abot didto sa kurbada, ang dalan dili kaayo siya pantay, mura’g naa siyay aspalto ba. According sa driver sa trailer (truck), pagkatagak sa ligid, mura’g niaksyon sya’g bawi. Na-timingan nga naay Bajaj, mao ‘to natagak ang pila ka bags nga cement didto sa Bao-bao,” saysay ni Lalang.
Dali usab nga gidala sa Mati City Provincial Hospital ang duha ka biktima ug ginapaabot na lang kung muduso og kaso ang langyaw batok sa driver sa truck nga naka-detain na karon sa Mati PNP.
RadyoMaN Kirby Manzon
